Jafar Najafov
YouTube kanalı açmaq üçün Google hesabına daxil ol, kanal yarat, ad və istifadəçi adını seç, sonra profilini tamamla. İlk videonu hazırlamazdan əvvəl kanalın kimə və hansı mövzuda kömək edəcəyini bir cümlə ilə yaz. Bu qərar həm ad seçimini, həm də ilk video planını asanlaşdırır.
YouTube kanalı necə açılır?
YouTube-un rəsmi təlimatında kompüter və mobil sayt üçün bu ardıcıllıq göstərilir:
- YouTube-a Google hesabınla daxil ol.
- Profil şəklinə bas və Settings bölməsini aç.
- Account bölməsində Add or manage channel(s) seç.
- Create a channel düyməsinə bas.
- Profil şəkli, kanal adı və handle, yəni istifadəçi adını daxil et.
- Create channel ilə tamamla.
Telefonda tətbiqin menyusu fərqli görünürsə, mobil brauzerdə YouTube saytından istifadə et. Google hesabı ilə video izləmək və abunə olmaq mümkündür, öz videolarını yayımlamaq üçün isə kanal lazımdır.
Kanal adını və mövzusunu seç
Adı bir dəfə eşidən insanın onu necə yazacağını düşün. Şəxsi brend qurursansa, öz adın uyğun başlanğıcdır. Mövzu kanalı qurursansa, adın gələcəkdə paylaşacağın məzmunu həddindən artıq məhdudlaşdırmamasına diqqət et. Brend adı seçmək üçün yoxlama siyahısı bu mərhələdə kömək edər.
“Texnologiya haqqında videolar” geniş mövzudur. “Azərbaycan dilində kiçik bizneslər üçün AI alətlərinin tətbiqi” daha konkret auditoriya və fayda göstərir. İlk mərhələdə eyni insanın ardıcıl izləmək istəyəcəyi mövzular seç.
YouTube Studio-da profilini tamamla
YouTube Studio-nun Customization bölməsində Profile vasitəsilə şəkil, banner, ad, handle, təsvir və keçidləri yenilə. Home bölməsində tanıtım videosu, seçilmiş video və kanal bölmələrini təşkil et.
Kanal təsviri üçün bu quruluşdan istifadə et: kimə kömək edirsən, hansı problemi həll edirsən və izləyici hansı videoları tapacaq? Yerinə yetirəcəyinə əmin olmadığın paylaşım cədvəlini vəd etmə.
Şərti kanal təsviri: “Kiçik biznes sahibləri üçün Azərbaycan dilində AI dərsləri. Burada mətn hazırlamağı, iş proseslərini sadələşdirməyi və alətlərin nəticələrini yoxlamağı praktik nümunələrlə göstərirəm.”
İlk 5 video üçün plan
| Video | İzləyicinin sualı | Göstərəcəyin nəticə |
|---|---|---|
| Başlanğıc dərsi | Haradan başlayım? | Bir sadə tapşırığın tamamlanması |
| Praktik tətbiq | İşimdə necə istifadə edim? | Bir məhsul üçün paylaşım mətni |
| Müqayisə | Hansı alət mənə uyğundur? | Eyni tapşırıq üzrə iki nəticə |
| Səhv analizi | Niyə istədiyim cavabı almıram? | Zəif tapşırığın düzəldilməsi |
| İzləyici sualı | Bu işi telefonda necə edim? | Telefonda göstərilən iş prosesi |
Hər videoya bir əsas sual seç. Əvvəldə nə göstərəcəyini de, sonra nümunəyə keç. Uzun təqdimat əvəzinə izləyicinin gözlədiyi hissəni tez göstərmək üçün montajda təkrarları çıxar.
Başlıq və üz qabığını necə hazırlamalı?
Başlıq videonun konkret mövzusunu izah etsin. Məsələn, “AI ilə hər şeyi dəyiş” əvəzinə “AI ilə bir həftəlik paylaşım planı hazırla” yaz. Üz qabığında həmin nəticəni göstər, telefonda oxunmayacaq qədər çox mətn yerləşdirmə.
Videoda olmayan nəticəni vəd etmə. Çəkilişdən əvvəl başlıq və əsas kadrı düşünmək, məzmunun məqsədini aydın saxlamağa kömək edir. İşıq və səsi yoxla, ilk sınaq videosunu telefonda qulaqcıqla dinlə.
Komanda ilə işləyirsənsə
Montajçı və ya köməkçiyə Google hesabının parolunu vermək əvəzinə kanal icazələrindən istifadə et. Rolu şəxsin görəcəyi işə uyğun seç. İş bitəndə həmin şəxsin girişinə yenidən bax.
İlk videolardan sonra nəyi ölçməli?
YouTube Studio-da videoların göstəricilərini eyni vaxt aralığı üzrə müqayisə et. Göstərimdən klik faizi başlıq və üz qabığı haqqında siqnal verir. İzləyicinin videodan çıxdığı hissələr isə girişin və izahın hansı yerini dəyişəcəyini göstərir. Bütün kanallara aid vahid “yaxşı CTR” rəqəmi götürmə.
Öz iş qeydinə üç sual əlavə et: hansı mövzu maraq doğurdu, hansı hissədə izləyici ayrıldı və növbəti videoda nəyi dəyişəcəksən? Daha ətraflı plan üçün YouTube-da izləyici və abunə qazanmaq bələdçisini oxu.
Tez-tez verilən suallar
Telefondan YouTube kanalı açmaq olar?
Bəli. Google hesabınla YouTube-un mobil saytına daxil olub kanal yaratma addımlarını izləyə bilərsən. Menyu dilindən asılı olaraq düymələrin adları fərqli görünəcək.
Kanal üçün bahalı kamera lazımdır?
İlk videoları telefonla hazırlaya bilərsən. Görüntünün aydınlığını, işığı və xüsusilə səsi yoxla. Avadanlıq seçimini çəkdiyin video növü və mövcud məhdudiyyətə görə et.
Kanal açan kimi gəlir əldə edəcəyəm?
Kanal yaratmaq gəlir yaratmır. Auditoriya, məzmun və seçdiyin gəlir modeli üzərində işləmək lazımdır. YouTube monetizasiya imkanları üçün Studio-dakı Earn bölməsinin cari tələblərini yoxla.
Səhv və ya dəyişən məlumat bildir · Redaksiya qaydaları
Bu yazı necə idi?
